Lodziarnia Rurański

Ogólne informacje

Lodziarnia Rurański

NASZ GYSZEFT W MIKOŁOWIE

Chciałach Wom opedzieć o naszym Mikołowie co jest okropnie fajny tyla sie w nim zmiyniło. Rynek jest teroz miyjscym, w kierym sie spotykajom i frele z karlusami i starziki ze starkami, pynzjonisty i ryncisty. Cza pedzieć, że idzie pochwolić sie jak wto przyjedzie na byzuch do Mikołowa rynkiym i nowom piyknom Bibliotekom, momy dwa basyny, wyszykowane na glanc i łodnowione szkoły. Na prowda mogymy sie chwolić na lywo i prawo a to wszystko dziynki tym co my ich wybrali. Momy tyż pikno Bazylika kiero teroz obchodzi 150 lat to zaś że jest tako piykno było zasługom śp. farorza Alfonsa Janika. Bardzo się ciesza, że jestech Mikołowiankom i wszyndzie sie chwola naszym piyknym Mikołowym. Ale jo chciałach Wom łopedzieć jeszcze coś jak my zaczynali nasz gyszeft z lodami. Zaczynali my łońskiego wieku 1954roku i zawsze na mikołowski odpust, a wtedy to nie było kompresorów (maszyny co schładzajom) i bezto w zima cza było zwiyś lód ze stawu (musioł mieć nojmnij 30 cyntów) cza było go dać do kopca z treci i bez lato on tracił na grubości. Maszyny to były takie drewniane beczki, w środku był kocioł co sie łobracoł w tyj beczce a na łokoło był tyn lód szarom solom posypany. Tak samo były umieszczone lody w konewkach po mlyku i jechało sie na "tura", to był taki woz (podobny jak piyrwyj jeździły cygany) z koniym i jeździło sie po wioskach i dzwoniło dzwonkiem. Dzieci czekały na nos, bo była to do nich uciecha., a kiery bajtel niy mioł piyniyndzy to lecioł do chlywika i przinios jajco za loda. Lody ładowało sie takom szpachlom na wafla (bo kubków i gałkownic niy było). Potym konika zamiynili my na auta, była to zielono Skoda kombi i Nysa. Jeździli my tysz na odpusty, a na odpuście wołali "lody, lody na śmietanie fto skosztuje..." a dzisioj by było "lody, lody na śmietanie, fto skosztuje wiagry niy poczebuje". A klijenów momy wielopokoleniowych bo Ci co sie na tych lodach wychowali pszichodzom z wnukami. A firma tysz jest wielopokoleniowo bo naprzód bardzo ciynczko charowali moi rodzice potym jo czyli Małgosia, a teroz robiom moje dzieci. Były ino 3 smaki śmietankowe, szekoladowe i truskawkowe, ale wszystko idzie z postympym, som gałkownice rozmaite kubki forymki, miseczki a lody tysz najrozmaitsze. Ale smak i to że som bez konserwantów i ulepszaczy się niy zmiyniło. Przeszło sie różne ustroje jak sie zaczynało sezon żeby dostać zezwolynie czeba było zapłacić na odbudowa Warszawy inaczyj zezwolynio sie niy dostało. Ale dzynki Bogu i klijyntom pszeczimali my wszystko i istniejymy do dziś, oby jak najdłużyj tak godajom klijynci. Jest jeszcze jedno, że przedtym klijynt czekoł na lody aż się ukryncom, a teroz my czekomy na klijynta, ale tak majom wszyscy co majom jakiś gyszeft, takie czasy.